ಗಾಳಿಸುದ್ದಿ- ಕಥೆ

ಗಾಳಿ ಸುದ್ದಿ

ಕಥೆಯೊಂದು ಪ್ರಚಲಿತದಲ್ಲಿತ್ತು! ಕಥೆ ಎಂದರೆ.... ಗಾಳಿಸುದ್ದಿ- ಪ್ರಚಲಿತದಲ್ಲಿರುವ ಕಥೆ!

ಕಥೆಯ ನಾಯಕ ಯಾವುದೋ ಒಬ್ಬ ಓದುಗ!

ಪುಸ್ತಕಗಳನ್ನು ಓದುವುದು.... ಅದರಲ್ಲಿನ ವಾಸ್ತವತೆಗಳನ್ನು ಪರೀಕ್ಷಿಸುವುದು ಅವನ ಹವ್ಯಾಸವಂತೆ!

ಹೇಳಿದ್ದೇನೆ- ಗಾಳಿಸುದ್ದಿ ಇದು- ವಾಸ್ತವ ಕಂಡು ಹಿಡಿಯಲಾಗದೇ ಹೋದ- ಗಾಳಿಸುದ್ದಿ!

೧

ಪುಸ್ತಕವೊಂದನ್ನು ಓದಿದನಂತೆ! ಬ್ಯಾಂಕನ್ನು ಕೊಳ್ಳೆಹೊಡೆಯುವ ಕಥೆ! ತಿಂಗಳುಗಟ್ಟಲೆ ಯಾರಿಗೂ ತಿಳಿಯದಂತೆ ಕಂದಕವೊಂದನ್ನು ಕೊರೆದು....

ಹಾಗೆಯೇ ಮಾಡಿದ!

೨

ಮತ್ತೊಂದು ಪುಸ್ತಕ... ಜನರ ನಡುವೆಯಿರುವ ಸಾಮಾನ್ಯ ಪ್ರಜೆಯೊಬ್ಬ ಕೊಲೆ ಮಾಡಿದರೆ ಸಿಕ್ಕಿಕೊಳ್ಳುವ ಅವಕಾಶ ಕಮ್ಮಿ ಅನ್ನುವ ಕಥಾವಸ್ತು!!

ಅವನ ಮೂವರು ಶತ್ರುಗಳನ್ನು- ವೈಮನಸ್ಯ ಇರುವವರನ್ನು ಕೊಂದ- ಅವರ ಮರಣಕ್ಕೆ ಕಾರಣ ನಿಜ ಪ್ರಪಂಚಕ್ಕೆ ತಿಳಿಯದು! ಎಲ್ಲವೂ ಪುಸ್ತಕವೊಂದರ ಪ್ರೇರಣೆ ಎಂದಷ್ಟೇ ತಿಳಿದಿದೆ! ಲೇಖಕನನ್ನು ಸಂಶಯಿಸುವುದು ಹೇಗೆ- ಕಾರಣ ಮಾಡುವುದು ಹೇಗೆ?

೩

ಸುಮಾರು ಹದಿನೇಳು ಪುಸ್ತಕಗಳನ್ನು ತನ್ನ ಜೀವನದಲ್ಲಿ ಪ್ರಯೋಗಿಸಿದ- ಓದುಗ!

ಈಗ... ಹದಿನೆಂಟು-

ಹೆಣ್ಣನ್ನು ಸೆಳೆಯುವುದು ಹೇಗೆ ಅನ್ನುವ ಪುಸ್ತಕ!!

ಸೆಳೆದೇ ಸೆಳೆದ! ಹಾರಿಸಿಕೊಂಡು ಹೋಗಿ ಮದುವೆಯೂ ಆದ!

ಪ್ರಾಣ ಪ್ರಿಯೆಯ ಪ್ರಶ್ನೆ-

“ಒಂದೇ ಒಂದು ಪ್ರಶ್ನೆ! ಒಂದೇ ಒಂದು ವಾಕ್ಯದಲ್ಲಿ ಉತ್ತರ ಕೊಡಿ- ಇಷ್ಟೊಂದು ಹಣ ಹೇಗೆ ಸಂಪಾದನೆ ಮಾಡಿದಿರಿ?”

ಕೇಳುತ್ತಿರುವುದು ಹೆಂಡತಿ- ಚತುರೆ! ಅಷ್ಟಿಲ್ಲದೆ ಹಾರಿಸಿಕೊಂಡು ಬರುತ್ತಿದ್ದನೆ?

ಉತ್ತರವೂ ಸಿದ್ದ!

“ನೀನು ನನ್ನ ಹದಿನೆಂಟನೆಯ ಪುಸ್ತಕ!”

“ಅರ್ಥವಾಗಲಿಲ್ಲ!” ಎಂದಳು.

“ಒಂದೇ ಪ್ರಶ್ನೆ ಒಂದೇ ಉತ್ತರ! ಅರ್ಥವಾದರೂ ಆಗದಿದ್ದರೂ!” ಎಂದ.

“ಓ...” ಎಂದಳು- ಏನೋ ಅರಿತವಳಂತೆ.

ಏನು ಅನ್ನುವಂತೆ ನೋಡಿದ.

“ನೀವೂ ಕೂಡ ಆ ಲೇಖಕನ ಅಭಿಮಾನಿಯೋ...?” ಎಂದಳು.

ಮುಗುಳು ನಕ್ಕ.

“ಆ ಲೇಖಕ ಬರೆದ ಒಂದೊಂದು ಪುಸ್ತಕದಂತೆಯೂ ಘಟನೆಗಳು ನಡೆದಿದೆ!! ಹೆಚ್ಚಾಗಿ ಯಾರಿಗೂ ಆತನಬಗ್ಗೆ ತಿಳಿಯದು! ಆ ಲೇಖಕನನ್ನು ಯಾರಾದರೂ- ಎಷ್ಟು ಪುಸ್ತಕ ಬರೆದಿದ್ದೀರ ಎಂದು ಕೇಳಿದರೆ ಆತ ಕೊಡುವ ಉತ್ತರದಂತಿದೆ- ನಿಮ್ಮ ಉತ್ತರ!” ಎಂದಳು.

ಅವನ ಮುಗುಳುನಗು ಮಾಸಲಿಲ್ಲ- ಕಣ್ಣುಗಳು ಮಿನುಗಿದವು!

ಮುಂದೆ ಆ ಲೇಖಕನ ಪುಸ್ತಕಗಳು ಬರಲಿಲ್ಲ!